قصور: نیوسبزی منڈی کی شہر سے باہر منتقلی التواء کا شکار،ٹریفک جام
قصور(نمائندہ نوائے وقت)کروڑوں روپے کی لاگت سے تیار ہونیوالی نیوسبزی منڈی بااثر آڑھتیوں اور حکومتی عدم توجہ کے باعث التوا کا شکار،منڈی شہر سے باہر شفٹ نہ ہونے کے باعث گاڑیوں،ریڑھیوںاور لوڈر رکشوں سے بے ہنگم ٹریفک شہریوں کیلئے وبال جان بن گئی ،پرانی منڈی کو فوری طور پر شہر سے باہر نیو منڈی پل دولے والا شفٹ کیاجائے ،شہریوںکا مطالبہ ۔ سابق حکومت نے پرانی منڈی کو شہر سے باہر منتقل کرنے کیلئے کروڑوں روپے لگا کر شہر سے باہر پل دولے والا میں رقبہ خرید کیا اور اس کی چار دیواری بھی کر وا دی تاہم اتنی بڑی رقم لگانے کے باوجود تیار کی جانیوالی نیو سبزی منڈی بااثر آڑھتیوں اور حکومت کی عدم توجہ کے باعث التواء کا شکار نظر آتی ہے،پرانی منڈی شہر سے باہر منتقل نہ ہونے کے باعث گنڈا سنگھ سمیت دیگر دیہات سے سبزیاں وپھل لے کر آنیوالے کسانوںاور شہریوں کو ٹریفک سمیت کئی ایک مشکلات کا سامنا کرنا پڑ رہا ہے۔
