قصور+ جہلم+ کراچی (نمائندہ نوائے وقت+ نوائے وقت رپورٹ) قصور میں حبیب آباد بائی پاس کے قریب تیز رفتاربس ڈالہ سے ٹکرا کر الٹ گئی جس کے نتیجہ بس کا گن مین غلام رسول اور کنڈکٹر تصور موقع پر ہی جاں بحق ہو گیا جبکہ جعفر، زاہد ،ریحانہ بی بی ، امانت اور ارشد وغیرہ شدید زخمی ہوگئے جنہیں لاہور جناح ہسپتال منتقل کر دیا گیا، ڈالہ کا ڈرائیور موقع سے فرار ہو گیا۔ ادھر جہلم میں ٹریفک حادثے میں 2 خواتین جاں بحق، ایک شخص زخمی ہو گیا، پولیس کے مطابق جی ٹی روڈ پر ٹول پلازہ کے قریب بس نے رکشہ کو ٹکر مار دی۔ علاوہ ازیں کراچی کے علاقے ناظم آباد میں تیز رفتار ٹینکر نے موٹرسائیکل کو ٹکر مار دی، ٹریفک حادثے میں موٹرسائیکل سوار باپ اور بیٹی جاں بحق اور ایک شخص زخمی ہوگیا۔ پولیس کے مطابق مشتعل افراد نے ٹینکر کو آگ لگادی۔