اسلام آباد(نمائندہ خصوصی)پاکستان نے زمین سے ز مین تک مار کرنے والے شاہین ون اے بیلسٹک میزائل کا کامیاب تجربہ کیا ہے۔پاک فوج کے شعبہ تعلقات عامہ (آئی ایس پی آر) کے مطابق شاہین ون اے 900 کلومیٹر تک ہدف کو نشانہ بنا سکتا ہے۔آئی ایس پی آر کے مطابق میزائل تجربے کا مقصد ویپن سسٹم کے مختلف ڈیزائن اور تکنیکی پیرا میٹرز کو دیکھنا تھا۔میزائل تجربے کو ڈی جی اسٹریٹیجک پلانز ڈویڑن لیفٹیننٹ جنرل ندیم ذکی منج نے دیکھا ، ڈاکٹر رضا ثمر ، چیئرمین نیسمکام ، لیفٹیننٹ جنرل محمد علی ، کمانڈر آرمی اسٹریٹجک فورسز کمانڈ اور اسٹریٹجک تنظیموں کے سائنس دانوں اور انجینئروں نے فلائٹ ٹیسٹ دیکھا۔ڈائریکٹر جنرل اسٹریٹجک پلانز ڈویڑن نے سائنسدانوں اور انجینئرز کو اس کامیاب امتحان کے انعقاد پر مبارکباد پیش کی۔ انہوں نے سائنس دانوں اور انجینئروں کی تکنیکی صلاحیت ، لگن اور عزم کی تعریف کی ، جنھوں نے میزائل لانچ کو کامیاب بنانے میں پورے دل سے تعاون کیا۔صدر ، وزیر اعظم پاکستان ، چیئرمین جوائنٹ چیفس آف اسٹاف کمیٹی اور سروسز چیفس نے سائنسدانوں اور انجینئرز کو آج کے میزائل تجربے کے کامیاب انعقاد پر مبارکباد دی ہے۔