شاہ محمود کا اماراتی وزیر خارجہ سے رابطہ‘ دوطرفہ تعاون بڑھانے پر اتفاق
اسلام آباد (نمائندہ خصوصی) وزیر خارجہ مخدوم شاہ محمود قریشی نے متحدہ عرب امارات کے وزیر برائے امور خارجہ و بین الاقوامی تعاون کے امور وزیراعلی شیخ عبداللہ بن زید النہیان سے ٹیلیفونک گفتگو کی۔ وزیر خارجہ شاہ محمود قریشی نے دبئی کے نائب حکمران اور متحدہ عرب امارات کے وزیر خزانہ شیخ عثمان بن راشد المکتوم کے انتقال پر حکومت پاکستان اور عوام کی طرف سے دلی تعزیت کا اظہار کیا۔ مرحوم کے ایصال ثواب کے لئے دعا کرتے ہوئے وزیر خارجہ نے عظمت شیخ ہمدان بن راشد کی زندگی اور خدمات کو زبردست خراج تحسین پیش کیا۔ وزیر خارجہ شیخ عبد اللہ بن زید النہیان نے وزیراعظم عمران خان کی جلد صحت یابی اور اچھی صحت کے لئے نیک خواہشات کا اظہار کیا۔ دوطرفہ تعلقات میں ہونے والی پیشرفت پر اطمینان کا اظہار کرتے ہوئے، دونوں وزرائے خارجہ نے متعدد شعبوں میں تعاون کو مستحکم کرنے، دونوں ممالک کے مابین سفر کی آسانی کو آسان بنانے اور کثیرالجہتی تنظیموں میں باہمی تعاون کو تقویت دینے پر اتفاق کیا۔ وزیر خارجہ مخدوم شاہ محمود قریشی نے لارڈ واجد خان کو ’ہائوس لارڈز ‘کا رکن مقرر ہونے پر مبارک دی۔ انہوں نے لارڈ واجد خان کو ان اقدامات سے آگاہ کیا جو حکومت پاکستان نے کرونا عالمی وباء سے نمٹنے کے لئے کئے ہیں۔ لارڈ واجد خان نے عالمی وباء کی روک تھام کے لئے حکومت پاکستان کے کردار کو خراج تحسین پیش کیا۔ انہوں نے پاکستان اور برطانیہ کے درمیان روابط کے فروغ میں پاکستانی برادری کے فعال کردار کو اجاگر کیا۔
