پٹرولیم مصنوعات کے پچھلے سال پیدا ہونے والے بحران کے پیش نظر وزیراعظم کے معاون خصوصی ندیم بابر اور سیکرٹری پٹرولیم کو فارغ کردیا گیا ہے۔ وزیراعظم نے تحقیقات کا حکم دیا تھا جبکہ کارروائی وزارتی کمیٹی کی سفارشات پر کی گئی۔ دریں اثناء اسد عمر اور دیگر وفاقی وزراء نے میڈیا سے گفتگو کرتے ہوئے کہا کہ جو بھی قصوروار ہوگا جیل جائے گا۔ حکومت کی طرف سے مافیا کیخلاف کارروائی کا عندیہ یقیناً خوش آئند ہے لیکن کیا کیا جائے، کسی بھی معاملے میں حکومت جب کارروائی کا عزم ظاہر کرتی ہے تو مافیا پوری قوت اور پورے طمطراق کے ساتھ سینہ تانے کھڑا ہوجاتا ہے جیسا شوگر مافیا کررہا ہے۔ حکومت کی طرف سے کریک ڈائون کے بعد چینی کی بوری ایک دن میں 1200 روپے مہنگی ہوگئی۔ ایسی صورتحال سے تو آہنی ہاتھوں کے ساتھ ہی نمٹا جاسکتا ہے ورنہ منہ زور اور بے لگام مافیا حکومتی گورننس اور آئین و قانون کو بازیچہ اطفال بناتا اور من مانی کرتا رہے گا۔ اس لئے محض بیانات ہی نہیں، ٹھوس عملی اقدامات کی ضرورت ہے۔