لاہور (نامہ نگار) برکی روڈ پنگالی گاؤں  کے گھر میں گیس بھرنے سے خوفناک دھماکے کے نتیجے میں مکان زمین بوس ہو گیا۔  واقعہ میں  4بچے  جاں بحق جبکہ 11 افراد زخمی ہوگئے۔ دھماکے  کے نتیجے میں علاقے میں خوف وہراس پھیل گیا۔ لوگ خوفزدہ ہو کر گھروں سے باہر نکل آئے۔  تفصیلات کے مطابق برکی روڈ پنگالی گاؤں میں گیس بھرنے سے خوفناک دھماکے کے نتیجے میں مکان زمین بوس ہوگیا۔ دھماکے کی اطلاع ملنے پر پولیس اور ریسکیو 1122 اور ایدھی فائونڈیشن کی ٹیمیں جائے وقوعہ پر پہنچ گئیں اور مقامی افراد سے  ملکر  ملبے تلے دبے افراد کو باہر نکالا۔ ریسکیو ذرائع کے مطابق حادثے میں ملبے تلے دب کر 4 بچے جاں بحق اور 11 افراد زخمی ہوگئے۔ جاں بحق ہونے والوں میں 8سالہ علی ، 6سالہ شیری، 5سالہ حورین اور 6سالہ انوش شامل ہیں۔ جبکہ زخمیوں میں 12سالہ عمران ، 10سالہ سفیر ، 8سالہ ایان ، 40ثمینہ کو موقع طبی امداد دے کر فارغ کر دیا گیا۔ 25سالہ نرگس ، 11سالہ فیضان ، 30سالہ تصور کو میو ہسپتال اور 45سالہ رمضان ، 55سالہ فریاد ، اور 25سالہ مہناز کو طبی امداد کے لیے سروسز ہسپتال منتقل کر دیا گیا۔ ریسکیو حکام کا کہنا ہے کہ گھر میں گیس بھر گئی تھی۔ آگ جلانے پر دھماکہ ہو گیا۔ حادثے کی جگہ کو آپریشن مکمل کرکے کلیئر کردیا گیا۔ پولیس نے تخریب کاری کے امکانات کو رد کرتے ہوئے واقعہ کو محض حادثہ قرار دیا۔ اس موقع پر متاثرہ خاندان کے رشتہ دار مظفر علی نے نم آنکھوں کے ساتھ کہا کہ رات کو سوئے مگر کیا پتہ تھا کہ صبح ان پر قیامت ٹوٹ پڑے گی۔  پورا خاندان غم سے نڈھال ہے۔ دوسری جانب وزیراعلیٰ پنجاب سردار عثمان بزدار نے واقعہ پر  گہرے رنج اور دکھ کا اظہار اور لواحقین سے اظہار افسوس کرتے ہوئے واقعہ کی فوری رپورٹ طلب کر لی۔