لاہور(سپورٹس رپورٹر)پاکستان کرکٹ ٹیم کے وکٹ کیپر بیٹسمین محمد رضوان کو کپتان بابراعظم کے ساتھ لمبی اننگز کھیل کرکھیل کر مزہ آگیا۔سنچورین میں میڈیا سے گفتگو میں محمد رضوان نے کہا کہ میچ کافی مشکل تھا لیکن پلان کے مطابق چلے اور اچھا آغاز کیا۔پلان یہی تھا کہ پاور پلے کا زیادہ سے زیادہ فائدہ اٹھائیں، ہمیں سٹارٹ اچھا ملا، جس کے بعد مومینٹم بن گیا۔ خواہش تھی کہ دونوں بڑی اننگز کھیلیں۔ ہم دونوں کی خواہش یہی تھی کہ وکٹ گنوائے بغیر ہی جنوبی افریقہ کا 204 رنز کا ہدف حاصل کرلیں۔ بابراعظم کی سنچری پر اتنی ہی خوشی ہوئی، جیسی اپنی سنچری پر ہوئی تھی۔ پاکستانی بائولرز نے ڈیتھ اوورز میں اچھا کھیلا، ورنہ لگ رہا تھا کہ 230 رنز کا ہدف ملے گا۔ دو تین جگہوں پر اب بھی ہمیں بہتری کی ضرورت ہے، تاہم فہیم اشرف نے درمیان میں اچھی بائولنگ کی تھی۔ ٹیم کافی محنت کررہی ہے، رزلٹ ہمیشہ اللہ کے ہاتھ میں ہے، ہر کھلاڑی جیت کیلئے مثبت ہے، سیریز جیتیں گے۔