گکھڑمنڈی+ نارووال (نامہ نگاران) جی ٹی روڈ پر تیز رفتار ڈمپر کی ٹکر لگنے والی کار نے موٹر سائیکل سوار 2 بچیوں سمیت 4 افرادکو کچل دیا، چچا، بھتیجا موقع پر جاں بحق جبکہ دونوں بچیاں شدید زخمی ہو گئیں جبکہ نارووال کی نیولاہور روڈ ریسنیوال پھاٹک کے قریب تیز رفتار ٹریکٹر ٹرالی اور موٹرسائیکل میں تصادم، موٹرسائیکل سواردونوں نوجوان جاں بحق ہو گئے۔ تفصیلات کے مطابق ڈی سی کالونی مین گیٹ کے قریب جی ٹی روڈ پر تیز رفتار ڈمپر نے کار کو ٹکر مار دی تو کار بے قابو ہوکر آگے جانیوالے موٹر سائیکل سواروں پر چڑھ گئی جس سے لیبر گلشن کالونی کے رہائشی عرفان طارق اور اس کا بھتیجا احمد موقع پر ہی جاں بحق ہوگئے جبکہ دونوں بچیاں جن کی عمریں 4 سے 5 سال بتائی جاتی ہیں شدید زخمی ہوگئیں جن کو ڈسٹرکٹ ہسپتال پہنچا دیا گیا۔ ادھر ریسکیو 1122 کے مطابق ریسنیوال پھاٹک نیو لاہور روڈ پر تیز رفتار ٹریکٹر اور موٹر سائیکل کے درمیان ٹکر سے موضع اورنگ آباد جانے والے دو نوجوان 19سالہ فیضان اور24 سالہ کرامت موقع پر ہی جاں بحق ہوگئے، نعشیں ڈی ایچ کیو ہسپتال منتقل کردیں، اطلاع کے مطابق ٹریکٹر ٹرالی ڈرائیور موقع سے فرار ہوگیا پولیس مصروف تفتیش ہے۔