تہران(این این آئی ) ایران کی سول ایوی ایشن نے پاکستان اور بھارت میں کورونا وائرس کے کیسز میں غیرمعمولی اضافے کے پیش نظر دونوں ممالک کے لیے آنے اور جانے والی تمام پروازوں پر پابندی عائد کردی ہے۔ایران کی سرکاری نیوز ایجنسی نے بتایا کہ وزارت صحت کی جانب سے لیا گیا یہ فیصلہ ہفتہ کو آدھی رات کو نافذ ہوا۔ایران کی سول ایوی ایشن کے ترجمان محمد حسن زیبخش نے بتایا کہ ایران اور بھارت کے درمیان معمول کی پروازیں نہیں ہوتیں جبکہ کبھی کبھار پروازیں چلائی جاتی ہیں۔وزارت صحت کی ترجمان سیما سادات لاری نے بتایا کہ گزشتہ 24 گھنٹے کے دوران 18 ہزار 230 نئے کیسز رپورٹ ہوئے ہیں جس کے بعد ایران میں کورونا سے متاثرہ افراد کی مجموعی تعداد 23 لاکھ 77 ہزار ہوگئی۔