لاہور ( نیوز رپورٹر+نوائے وقت رپورٹ) شہباز شریف نے این اے 249 کے عوام کا شکریہ اور مفتاح اسماعیل کو مبارکباد دیتے ہوئے کہا کہ مفتاح اسماعیل کی جیت اور ان کے ووٹوں کی برتری کیسے کم ہوئی، پورے پاکستان نے دیکھا۔ پورا یقین ہے الیکشن کمشن انصاف اور شفافیت کے تقاضے پورے کرے گا۔ جمعیت علماء اسلام (ف) اور اے این پی کی طرف سے حمایت پر ان کے قائدین، کارکنوں، ووٹرز اور سپورٹرز کا خصوصی شکریہ ادا کرتے ہیں۔پاکستان مسلم لیگ(ن) کے صدر  اور قائد حزب اختلاف شہباز  شریف کا کہنا ہے کہ مفتاح اسماعیل کی جیت اور ان کے ووٹوں کی برتری کیسے کم ہوئی، پورے پاکستان نے دیکھا۔ شہباز شریف نے اپنے ایک بیان میں این اے 249 کراچی کے عوام کا شکریہ ادا کرتے ہوئے مفتاح اسماعیل کو مبارکباد اور شاباش پیش کی۔ان کا کہنا تھا کہ مفتاح اسماعیل نے جس طرح دن رات کام کیا، اس پر انہیں خراج تحسین پیش کرتا ہوں۔انہوں نے مزید کہا کہ تمام پارٹی عہدیداروں بالخصوص کراچی کی ٹیم کو بھی شاباش دیتا ہوں، ڈٹ کر مقابلہ کرنے پر کارکنان اور پارٹی عہدیداروں کو سلام پیش کرتا ہوں،شہباز شریف کا کہنا تھا کہ اللہ تعالیٰ پر بھروسے اور قومی و عوامی جذبے سے آگے بڑھتے رہیں گے، این اے 249 کراچی میں مسائل کے خاتمے کے لیے اپنی آواز اٹھاتے رہیں گے۔