فتح جنگ،فیروزوالہ، شیخوپورہ (نامہ نگاران، نمائندہ خصوصی) لاہور سے مردان جانے والی سادات ٹریول کی بس موٹر وے پر برہان انٹر چینج کے قریب تیز رفتاری کے باعث ڈرائیور سے بے قابو ہوکر موٹر وے کنارے کھائی میں جاگری جس کے نتیجے میں بس میں سوارماں بیٹی سمیت 12مسافر جاں بحق جبکہ18 زخمی ہوگئے  ۔  حسن ابدال کے علاقہ برہان انٹر چینج کے قریب تیز رفتاری کے باعث ڈرائیور سے بے قابو ہوکر موٹر وے کنارے قلابازیاں کھاتی ہوئی کھائی میں جاگری ۔  موٹر وے پولیس کے مطابق 4مسافر موقع پر ہی جاں بحق ہوگئے تھے جبکہ بقیہ 8مسافر ہسپتال پہنچ کر دم توڑ گئے ۔  فیروز والہ سے نامہ نگار کے مطابق جی ٹی روڈ کی آبادی لامبڑے ( مریدکے )کے قریب تیز رفتار کار بے قابو ہو کر موٹر سائیکل سواروں سے ٹکرا گئی جس کے نتیجہ میں میاں بیوی سمیت تین افراد جاں بحق ہو گئے ۔مریدکے کا خادم حسین اپنی بیوی سمیرا بی بی اور بھائی شہزاد کے ہمراہ موٹر سائیکل پر سوار ہو کراپنی بہن کو عید دینے کے لیے جا رہے تھے  ۔نعشیں دیکھ کر بہن بھی صدمے سے چل بسی، فیصل آباد سے آن لائن اور گوجرہ  سے نا مہ نگار  کے مطابق تیز رفتار ٹریکٹر ٹرالی کی مو ٹر سا ئیکل سوارو ں کو ٹکر،  میا ں بیوی جا ں بحق  ہو گئے ۔جڑانوالہ اور بچیانہ  سے نامہ نگار اور نمائندگان نوائے وقت کے مطابق ایم تھری موٹر وے پر تیز رفتار کاربے قابو ہو کر  سامنے جاتے ٹرالر سے ٹکرا گئی ،کارڈرائیور سمیت دو افراد جاں بحق  ہو گئے۔کسووال  اور چیچہ وطنی سے نامہ نگار ان کے مطابق کسووال نیشنل ہائی وے پر تیز رفتار ٹریکٹر ٹرالی کی موٹرسائیکل کو ٹکر، دو نوجوان موقع پر ہی جاں بحق ہوگئے۔