افغان قیادت کے غیر ذمہ دارانہ الزامات پر افغان سفیر سے سخت احتجاج کیا ہے: ترجمان دفتر خارجہ
اسلام آباد (نمائندہ خصوصی) ترجمان دفتر خارجہ زاہد حفیظ چوہدری نے افغان قیادت کے بے بنیاد الزامات پر میڈیا کے سوالات کے جواب میں کہا ہے کہ پاکستان نے افغانستان کو اپنی شدید تشویش سے آگاہ کرتے ہوئے افغان قیادت کے حالیہ غیر ذمہ دارانہ اور بے بنیاد الزامات پر اسلام آباد میں افغانستان کے سفیر سے سخت احتجاج (ڈیمارش) کیا ہے۔ پاکستان نے زور دیا ہے کہ بلاجواز الزامات اعتماد کو ٹھیس پہنچانے کے علاوہ دونوں برادر ممالک کے درمیان ماحول کو خراب کرتے ہیں جبکہ سہولت کاری کے اس تعمیری کردار کو نظر انداز کرنے کے مترادف ہیں جو پاکستان افغان امن عمل میں ادا کررہا ہے۔
