لاہور(نامہ نگار)بابوصابو چوک کے قریب دو مسافر بسیں آپس میں ٹکرا گئیں۔ حادثہ بابو صابو چوک میں اس وقت پیش آیا جب ایک بس موٹروے سے اتر رہی تھی اور دوسری بس ملتان جانے کیلئے ٹھوکر نیاز بیگ کی جانب جا رہی تھی۔ جلد بازی کا مظاہرہ کرنے پر ملتان جانے والی بس کا اگلا حصہ دوسری بس کے بائیں سائیڈ سے جا ٹکرایا۔ حادثے کی وجہ سے ٹریفک کا نظام درہم برہم ہو گیا اور گاڑیوں کی لمبی قطاریں لگ گئیں۔ ٹریفک پولیس کے اہلکاروں نے موقع پر پہنچ کر متاثرہ بسوں کو راستے سے ہٹا دیا اور ٹریفک کو بحال کر دیا گیا۔ پولیس کا کہنا ہے کہ حادثے کے نتیجے میں کوئی جانی نقصان نہیں ہوا، تاہم دونوں بسوں کو جزوی طور پر نقصان پہنچا ہے۔ شوکت خانم ہسپتال کے قریب تیز رفتار کار نے دوسری کار کو ٹکر مار دی۔ ٹکر مارنے والی کار بے قابو ہو کر فٹ پاتھ سے ٹکرا گئی۔ حادثے میں کار سوار دو افراد معمولی زخمی ہوگئے۔