کراچی (نوائے وقت رپورٹ) کلفٹن تین تلوار پر سنار کی دکان سے سوا دو کروڑ کی چوری ہوگئی۔ذرائع کے مطابق کراچی کے پوش علاقے کلفٹن تین تلوار پر رواں سال کی دوسری بڑی چوری کی واردات ہوئی ہے۔ چور سنار کی دکان سے سوا کروڑ کا سونا اور 85 لاکھ کیش لے اڑے۔پولیس حکام کے مطابق مبینہ طور پر دکان میں مجموعی طور سوا دو کروڑ روپے کی واردات ہوئی، ملزمان نے تجوری توڑنے کے بعد واردات کی، تجوری میں ڈیڑھ کلو سونا اور 85 لاکھ روپے تھے۔پولیس حکام کا کہنا ہے کہ واقعے کی اطلاع ملتے ہی پولیس کی نفری جائے وقوعہ پر پہنچ گئی، سنار کی دکان میں 9 سی سی ٹی وی کیمرے لگے ہوئے ہیں، لیکن کوئی ایک کیمرا بھی کام نہیں کررہا، جب کہ دکان کا لوہے کا دروازہ ٹوٹا ہوا ہے اور شیشے کا دروازہ بالکل ٹھیک ہے۔ پولیس نے تحقیقات شروع کر دیں ۔