لاہور(سپورٹس رپورٹر) پاکستان سپرلیگ کے سلسلہ میں ابو ظہبی میں آج ایک اور کل دو میچ کھیلے جائیں گے ۔ آج کا واحد میچ کوئٹہ گلیڈی ایٹرز اور پشاور زلمی کے درمیان کھیلا جائیگا۔ میچ پاکستانی وقت کے مطابق رات 9بجے شروع ہوگا۔ کل 13 جون کو دو میچ کھیلے جائیں گے ۔ پہلا میچ شام 6بجے اسلام آباد یونائیٹڈ اور لاہور قلندرزکے درمیان کھیلا جائیگا۔ دوسرا میچ رات گیارہ بجے ملتان سلطانز اور پشاور زلمی کے درمیان شروع ہوگا۔ کراچی کنگز کے کپتان عماد وسیم نے کہا ہے کہ ملتان سلطانز کیخلاف پاور پلے میں سست آغاز کے باعث میچ نہ جیت سکے۔ میچ ہارنے میں کوئی برائی نہیں ۔ خامیوں پر قابو پانے کی کوشش کریں گے۔ لاہور قلندرز کے بلے باز ٹم ڈیوڈ نے کہا ہے کہ ہمارا ٹارگٹ صرف ٹورنامنٹ جیتنا ہے۔  چھکے لگا کر اچھا لگا،  مزید چھکے لگانا چاہتا تھا۔انہوں نے کہا کہ محمد حفیظ اور فخر زمان کیساتھ بھی پارٹنر شپ کرنا چاہتاہوں۔ راشد خان کا میچ میں پانچ وکٹ لینا شاندار رہا۔ پشاور زلمی کے شعیب ملک نے کہا کہ  راشد خان کی بائولنگ نے ہماری ٹیم کی کمر توڑ دی،    ٹیم کی ضرورت کے مطابق بیٹنگ کی۔  بطور سینئر اپنی رائے دیتا ہوں۔ پشاورزلمی کوشش کریگی  اگلے میچز میں بہترکھیل پیش کرے۔