لاہور (سپورٹس رپورٹر)سابق عظیم ٹیسٹ کرکٹر مرحوم عبدالقادر کو خراج عقیدت پیش کرنے کیلئے نمائشی میچ کل اتوار کو لاہور میں کھیلا جائیگا، نامور کرکٹرز میچ میں شریک ہونگے، ان خیالات کا اظہار ساگا سپورٹس کے علی سیف نے نیشنل ہاکی سٹیڈیم میں پریس کانفرنس کرتے ہوئے کیا۔ اس موقع پر ٹیسٹ کرکٹر عبدالرحمان اور ٹیسٹ کرکٹر عمران نذیر بھی موجود تھے۔ علی سیف کا کہنا تھا کہ ٹیسٹ کرکٹرز کو خراج عقیدت پیش کرنے کیلئے ساگا سپورٹس کے زیر اہتمام پہلا نمائشی میچ مالیگ سپن باولر مرحوم عبدالقادر کے نام پر کرایا جا رہا ہے۔ اظہر علی، عمران نذیر، عبدالرحمان، رانا نوید الحسن، ہمایوں فرحت، عمران فرحت سمیت دونوں ٹیموں میں ٹاپ خواتین کھلاڑی بھی شامل ہونگی۔ ٹیسٹ کرکٹر عبدالرحمان کا کہنا تھا کہ یہ ایک بہت اچھا اقدام ہے جس سے ماضی کے نامور کھلاڑیوں کی خدمات کو خراج عقیدت پیش کیا جائیگا، مرحوم عبدالقادر کی پاکستان کیلئے بڑی خدمات ہیں جن کو خراج عقیدت پیش کیا جانا ضروری تھا۔ ٹیسٹ کرکٹر عمران نذیر نے عبدالقادر کوخراج عقیدت پیش کرنے کیلئے میچ کے انعقاد کو خوش آئند قرار دیتے ہوئے کہنا تھا کہ یہ سلسلہ بہت پہلے شروع ہونا چاہیے تھا۔