کراچی (نوائے وقت رپورٹ) وزیراعلیٰ سندھ مراد علی شاہ نے پاکستان تحریک انصاف کو آڑے ہاتھوں لیتے ہوئے کہا ہے کہ  پی ٹی آئی نالہ پارٹی بن گئی ہے اور نالے میں بہہ جائے گی۔کراچی میں پریس کانفرنس کرتے ہوئے وزیراعلیٰ سندھ مراد علی شاہ نے وفاقی حکومت کو کڑی تنقید کا نشانہ بنایا۔ مراد علی شاہ کا کہنا تھا کہ یہ لوگ کہتے ہیں سندھ کو پیسے نہیں دیں گے۔ یہ کھا جائیں گے۔ وفاق سندھ کو پیسے دے کر احسان نہیں کررہا۔ 70 فیصد ریونیو سندھ سے جمع ہوتا ہے اس لیے ہمارے حصے کے مطابق ہمیں پیسے دیں۔ ان لوگوں نے 742ارب میں سے 62 ارب پہلے ہی کاٹ لیے۔ انہوں نے کہا کہ کسی صوبے سے اختلاف نہیں۔ وفاق سب کو برابر دیکھے، سندھ سے شدید ناانصافی ہوئی۔ باقی صوبوں کے برعکس سندھ میں روڈ کا کوئی نیا پراجیکٹ نہیں رکھا بلکہ غیرضروری پراجیکٹس زبردستی تھوپے گئے۔ وفاقی حکومت میگا پراجیکٹس کے بجائے نالوں اور مین ہول پر کام کر رہی ہے۔ پی ٹی آئی نالہ پارٹی بن گئی ہے او رنالے میں بہہ جائے گی۔ وزیراعلیٰ سندھ کا کہنا تھاکہ وفاق جس طرح سے سوچ رہا ہے صوبوں کو اس طرح نہیں کچل سکتا۔ سندھ پر کوئی آرٹیکل نہیں لگ سکتا۔ سندھ کے ساتھ نا انصافی ہورہی ہے اور میں سندھ کا وزیراعلیٰ ہوں اس لیے سندھ کی حقوق کی بات کرتا ہوں۔  میں جب سندھ کے مسئلے بتاتا ہوں تو چڑ کیوں لگتی ہے؟  ایک دم حملہ آور کیوں ہوجاتے ہیں۔ انہوں نے مزید کہا کہ اگر گروتھ بڑھ گئی ہے تو ٹیکسز بھی بڑھنے چاہئیں۔ صوبائی بجٹ وفاق کے فنڈز پر منحصر ہوتا ہے۔ اکثر ٹیکسز وفاق کلیکٹ کرتا ہے۔ میں فیکٹ پیش کرتا ہوں تو انہیں بْرا لگتا ہے۔ اس وقت ایف بی آر کے ٹیکسز کی گروتھ 17 فیصد ہے اور 17 فیصد گروتھ  3 سال کی ہے جس  کے بارے میں ڈھول بجارہے ہیں جبکہ وزیراعلیٰ سندھ مراد علی شاہ نے کرونا ٹاسک فورس کے اجلاس ایکسپو سنٹر میں بغیر ویکسین سرٹیفکیٹ جاری کرنے کی خبر کا نوٹس لیتے ہوئے متعلقہ شخص کے خلاف آئی جی وزارت داخلہ کو سخت کارروائی کی ہدایت کر دی۔ وزیراعلیٰ سندھ نے ایکسپو سنٹر میں پیسوں کے عوض ویکسین لگانے کا بھی نوٹس لیتے ہوئے آئی جی سندھ پولیس کو ملزم کی گرفتاری کا حکم دیدیا۔ وزیراعلیٰ سندھ کا کہنا تھا کہ کرونا کے خلاف جاری کسی کام میں کوئی کرپشن اور نااہلی برداشت نہیں کریں گے جبکہ ڈرائیونگ لائسنس کیلئے کرونا ویکسی نیشن لازمی قرار دیدی۔