لاہور(لیڈی رپورٹر) پیپلز پارٹی کی خواتین رہنماؤں نے سابق وزیر اعظم بینظیر بھٹو کی 68 ویںسالگرہ کے موقع پر انہیں زبردست خراج تحسین پیش کرتے ہوئے کہا کہ بینظیر بھٹو کی جمہوریت کیلئے خدمات ناقابل فراموش ہیں ، وہ عالم اسلام کی پہلی خاتون وزیراعظم تھیں ، انہوں نے پاکستان میں خواتین کو ترقی کے دھارے میں شامل کرنے اور ان کے احوال کو بہتر بنانے کیلئے لازوال کردارادا کیا ۔ گزشتہ روز نوائے وقت سے گفتگو میں سابق وزیر ثمینہ گھرکی اور سابق ارکان قومی اسمبلی بیلم حسنین ، ثمینہ پگانوالہ نے کہا کہ محترمہ ایک مثالی لیڈر، مثالی ماں اور محب وطن شخصیت تھیں جن کے کارنامے سنہرے الفاظ میں لکھنے کے قابل ہیں۔ سابق ارکان پنجاب اسمبلی صغیرہ اسلام اور نجمی سلیم نے کہاکہ بینظیر بھٹوعالمی سطح کی انتہائی قابل لیڈر تھیں جو پاکستان کو بلند تر مقام پر لے جانے کیلئے عمر بھر جدوجہد کرتی رہیں۔