ابوظہبی(سپورٹس ڈیسک) پی ایس ایل 6 کے دوسرے ایلیمنیٹر راؤنڈ میں پشاور زلمی نے اسلام آباد یونائیٹڈ کو شکست دے کر فائنل میں جگہ بنالی ۔اسلام آباد یونائیٹڈ نے پہلے بیٹنگ کرتے ہوئے مقررہ 20 اوورز میں 9 وکٹ کے نقصان پر 174 رنز بنائے۔پشاور زلمی کے کپتان نے ٹاس جیت کر پہلے فیلڈنگ کا فیصلہ کیا۔ اسلام آباد یونائیٹڈ کے اوپننگ بلے باز عثمان خواجہ بدقسمت رہے اور پہلے ہی اوور میں ایک رن بنانے کے بعد رن آؤٹ ہوگئے جب کہ محمد اخلاق 7 رنز کے مہمان ثابت ہوئے۔کولن منرو نے جارحانہ کھیل پیش کرتے ہوئے 44 رنز کی اننگز کھیلی اور برینڈن کنگ بھی 18 رنز کے مہمان ثابت ہوئے اور افتخار احمد 10 رنز پر کامران اکمل کو کیچ دے بیٹھے۔ کپتان شاداب خان 15 اور آصف علی 8 رنز بنانے کے بعد عمید آصف کا شکار بنے۔حسن علی نے 16 گیندوں پر 45 رنز کی دھواں دھار اننگز کھیلی جس میں 3 چھکے اور 5 چوکے شامل تھے۔ پشاور زلمی کی جانب سے عمید آصف اور وہاب ریاض نے 2،2 ، محمد عرفان ، محمد عمران اور عماد بٹ نے ایک ایک وکٹ حاصل کی۔پشاور زلمی نے 175رنز کا ہدف 17ویں اوور میں ایک وکٹ کے نقصان پر حاصل کر لیا۔حضرت اللہ زئی زئی  اور جونتھن ویلز نے شاندار ففٹیاں سکور کر کے ٹیم کی جیت میں اہم کر دار ادا کیا۔ حضرت اللہ زئی زئی نے 44گیندوں پر 66رنز جبکہ جونتھن ویلز نے 43گیندوں پر 55رنز بنائے۔