اسلام آباد (نوائے وقت رپورٹ) آئی ایس پی آر کے مطابق پاکستان نیول اکیڈمی کراچی میں مڈشپ مین کورس کی پاسنگ آؤٹ پریڈ ہوئی۔ چیئرمین جوائنٹ چیفس آف سٹاف کمیٹی جنرل ندیم رضا پریڈ کے مہمان خصوصی تھے۔ سربراہ پاک بحریہ ایڈمرل امجد خان نیازی بھی پریڈ تقریب میں موجود تھے۔ کورس میں سعودی نیول فورس اور بحرین کی ڈیفنس  فورسز کے جوان بھی پاس آؤٹ ہوئے۔ جنرل ندیم رضا نے ٹریننگ مکمل کرنے والے کیڈٹس کو مبارک باد دیتے کہا کہ پاکستان خطے میں امن کے فروغ کیلئے پرعزم ہے۔ پوری قوم دہشت گردی اور انتہا پسندی کے خلاف متحد ہے۔ دنیا امن کے فروغ کیلئے پاکستانی کوششوں کو تسلیم کرے اور بھارتی غیرقانونی قبضے والے کشمیر میں انسانی حقوق کی خلاف ورزیوں کا نوٹس  لے۔ جنرل ندیم رضا نے نمایاں کارکردگی دکھانے والوں کو اعزازات سے نوازا۔ قائداعظم گولڈ میڈل لیفٹیننٹ معراج خالد خان نے حاصل کیا۔ حمزہ ملک کو بورڈ آف آنر سے نوازا گیا۔ آفیسر کیڈٹ حذیفہ کو سی جے سی ایس سی گولڈ میڈل سے نوازا گیا۔