انگلینڈ آسان حریف نہیں ورلڈ کپ تیاری کا بہترین موقع ہے بابر اعظم
لاہور(سپورٹس رپورٹر) قومی ٹیم کے کپتان بابر اعظم نے انگلینڈ کیخلاف ون ڈ ے سیریز جیت کر ورلڈکپ کوالیفائی کیلئے اچھا آغاز کرنے کو اولین ہدف قرار دیدیا۔بابر اعظم نے کہا کہ ون ڈے کرکٹ زیادہ نہیں ہورہی لیکن اس کے باوجود جوش وخروش اور جذبے میں کمی نہیں آئی، جنوبی افریقہ کیخلاف سیریز میں عمدہ پرفارمنس کا سلسلہ انگلینڈ میں جاری رکھنے کی کوشش کریں گے۔ ون ڈے میں مائنڈ کو تھوڑا تبدیل کرنے کی ضرورت ہوتی ہے، ون ڈے ٹیم میں حارث سہیل اور سعود شکیل کے آنے سے مڈل آرڈرکو مضبوط بنانے میں مدد ملے گی،مڈل آرڈر میں جو کچھ مشکلات کا سامنا تھا، امیدہے کہ اس سیریز میں پہلے کی طرح مسائل کا سامنا نہیں کرنا پڑیگا۔بابراعظم نے کہاکہ انگلینڈ میں اچھی وکٹیں ملتی ہیں جو ہمارے لیے بھی ساز گارہوتی ہیں، ہمارا کمبی نیشن کافی اچھا بنا ہواہے،تمام لڑکے اچھا کھیل پیش کرنے کیلئے تیار ہیں۔ مختلف کنڈیشنز میں پرفارم کرنا ہمیشہ چیلنج ہوتاہے، میزبان ٹیم ون ڈے کی بہترین ٹیم ہے، اس کیخلاف جب بھی میچ ہواہم نے اچھی فائٹ کی ہے، ان کی ٹیم میں بٹلر، سٹوکس، جوروٹ ، مورگن جیسے بہترین کھلاڑی ہیں، ورلڈکپ میں انگلینڈ کو کافی ٹف ٹائم دیاہے، اس بار بھی یہ ہی کوشش ہوگی۔بابر اعظم نے بتایا کہ کپتانی کو انجوائے کررہاہوں اور اس میں مزید بہتری لانے کیلئے سیکھ رہاہوں، لڑکے بھی مکمل سپورٹ کررہے ہیں، سب کو اپنی اپنی ذمہ داریوں کا احساس ہے، میچ کی صورتحال کے مطابق کوشش کرتا ہوں کہ زیادہ جذباتی نظرآنے کے بجائے ٹھنڈے دماغ کیساتھ فیصلے کروں۔ کھیل میں ہر دن اچھا نہیں ہوتا،اس کے باوجود کوشش کرتا ہوں کہ ہر اننگز اچھی کھیلوں۔ انگلش ٹیم اپنے گراؤنڈ پر آسان حریف ثابت نہیں ہوگی۔ انگلینڈ کے خلاف سیریز اچھی ثابت ہوگی، ون ڈے سیریز ورلڈ کپ کی تیاری کیلئے بہترین موقع ہے۔ کپتانی میرے لئے اعزاز ہے،جو گولز بنائے وہ حاصل کررہا ہوں، بائیو سیکیور ببل کے عادی ہوچکے لیکن یہ مشکل مرحلہ ہوتا ہے۔ شائقین کی سپورٹ سے حوصلہ بڑھتا ہے اور اعتماد ملتا ہے۔
