لاہور (نامہ نگار) نشتر کالونی کے  ایک گھر میں گیس سلنڈر زور دار دھماکے سے پھٹنے کے بعد  آگ لگ گئی۔ چھت بھی زمین بوس ہو گئی ہے۔ جس سے ماں 3بچوں سمیت شدید زخمی ہو گئی جبکہ زوردار دھماکے سے علاقے میں شدید خوف وہراس پھیل گیا ہے۔ تفصیلات کے مطابق نشتر کالونی کے علاقے حاجی پورہ اٹاری دربار کے قریب گھر میں کھانا پکاتے ہوئے گیس لیکج کے باعث ایل پی جی سلنڈر زوردار دھماکے سے پھٹ گیا۔ جس کے نتیجے میں آگ لگ گئی اور مکان کی چھت بھی گرگئی۔ کمرے میں موجود 50 سالہ ممتاز بی بی اور اس کا 15سالہ بیٹا شہباز،16سالہ بیٹی آمنہ اور ساڑھے 13سالہ بیٹی رمشا جھلسنے اور ملبے تلے دبنے سے شدید زخمی ہو گئے۔  ریسکیو ٹیموں نے چاروں زخمیوں کو ہسپتال منتقل کر دیا ہے۔ سلنڈر دھماکے سے لاکھوں روپے مالیت کا نقصان بھی ہو گیا ہے۔