لاہور، رائیونڈ (نامہ نگار) رائے ونڈ روڈ پر واقع سوسائٹی میں نجی فاؤنڈیشن کے ٹریننگ سنٹر میں آگ لگنے سے 3  خواتین جھلسنے اور دم گھٹنے سے جاں بحق، جبکہ دو افراد شدید زخمی ہوگئے۔ تفصیلات کے مطابق نیو لاہور پارک سوسائٹی کے نجی فاؤنڈیشن کے ٹریننگ  سنٹر میں آگ لگنے سے دھواں بھر گیا۔ جھلسنے اور دھویں سے دم گھنٹے کے باعث 2 خواتین سمیت 4  افراد کی حالت غیرہوگئی۔  ریسکیو ٹیم نے متاثرہ افراد کو ہسپتال منتقل کر دیا اور آگ پر قابو پا لیا۔ آگ سے لاکھوں روپے کا سامان جل کر خاکستر ہوگیا۔ جبکہ ہسپتال میں  3  خواتین دم توڑ گئیں۔  نعشیں  پوسٹ مارٹم کے لئے  منتقل کر دی گئیں۔ زخمی 30 سالہ وقاص اور 45  سالہ عدیل کی حالت بھی تشویشناک بتائی جاتی ہے۔  دریں اثناء رات گئے جاں بحق ہونے والی خواتین کی شناخت 22  سالہ نیلم، 25  سالہ منیزہ اور 45 سالہ ربیکا کے نام سے ہوئی ہے۔ وزیراعلیٰ پنجاب  نے بھی واقعے کا نوٹس  لیتے ہوئے سی سی پی او اور کمشنر لاہور سے رپورٹ طلب کر لی ہے۔ عینی شاہد کے مطابق آگ شارٹ سرکٹ سے لگی۔ پولیس کے مطابق  واقعہ قدرتی حادثہ ہے۔