امریکہ‘ یورپ‘ سعودی عرب اور خیبر پی کے میں افغان مہاجرین نے عید منائی
اسلام آباد (صباح نیوز+ اے پی پی) یورپ، امریکا، برطانیہ اور جاپان، افریقہ مشرق بعید کے ممالک، ملائشیا، انڈونیشیا، برونائی دار السلام، وسطی ایشیا، سعودی عرب، متحدہ عرب امارات سمیت خلیجی ممالک اور ترکی میں بھی منگل کے روز عید الاضحیٰ منائی گئی ہے۔ مکہ مکرمہ، مسجد الحرام میں نماز عید الاضحی ادا کرنے کے بعد مسلمانوں نے سنت ابراہیمی پر عمل کرتے ہوئے قربانی کی۔ سعودی عرب میں عید کا بڑا اجتماع مسجد نبوی ﷺ میں ہوا۔ جہاں حاجیوں سمیت لاکھوں افراد نے نماز عید ادا کی اور کرونا کی وجہ سے سماجی فاصلے اور احتیاطی تدابیر کا مکمل خیال رکھا گیا۔ کرونا وبا کے خاتمے اور امت مسلمہ کی سلامتی و ترقی کیلئے خصوصی دعائیں کی گئیں۔ خیبر پختونخوا میں مقیم افغان مہاجرین نے سعودی عرب کے ساتھ عید الاضحی منائی۔ پشاور سمیت خیبرپی کے کے مختلف علاقوں میں افغان مہاجرین نے گزشتہ روز عید الاضحی منائی۔ عید الاضحیٰ کی نماز کا بڑا اجتماع پشاور کے بورڈ بازار میں ہوا۔ افغان مہاجرین نے سنت ابراہیمی کی پیروی کرتے ہوئے قربانی کی۔
