لاہور(سپورٹس رپورٹر)پاکستانی کرکٹرز نے اولمپکس میں جیویلن تھرو ایونٹ کے فائنل میں کوالیفائی کرنے والے ارشد ندیم کو مبارکباد دی اور ان کیلئے حوصلہ افزا پیغامات دیئے ہیں۔ وہاب ریاض نے ارشد ندیم کو قوم کا جیویلن ہیرو قرار دیتے ہوئے کہا کہ آپ نے ہمارا سر فخر سے بلند کردیا۔ حسن علی نے لکھا کہ میاں چنوں سے تعلق رکھنے والے ہمارے ہیرو ارشد ندیم آپ کو مبارک ہو، انشااللہ آپ سرخ رو ہوں گے، ہماری دعائیں آپ کیساتھ ہیں‘آپ میڈل جیتیں انعام دونگا۔ عماد وسیم نے بھی کہا کہ آپ نے ہمارا سر فخر سے بلند کردیا، آپ کیلئے فائنل کیلئے نیک تمنائیں ہیں۔ کامران اکمل نے لکھا کہ گروپ بی میں پہلی پوزیشن کے ساتھ آپ کو مبارکباد دیتے ہیں۔ وسیم اکرم نے کہا کہ ٹوکیو اولمپکس میں گوجرانوالہ اور میاں چنوں سے اتھلیٹس نے پرفارم کیا، طلحہ طالب اور ارشد ندیم نے شاندار پرفارمنس کا مظاہرہ کیا۔ طلحہ اور ارشد کی وسائل کی کمی کے باوجود پرفارمنس پاکستان میں ٹیلنٹ کا ثبوت ہے۔شاہد آفریدی نے کہا کہ ارشد ندیم بہترین اتھلیٹ ہیں، فائنل میں ارشد ندیم کے میڈل جیتنے کیلئے نیک خواہشات کا اظہار کرتا ہوں۔