کوہاٹ: راستے کے تنازعہ پر فائرنگ، 2 بھائیوں سمیت 3 افراد جاں بحق
کوہاٹ(این این آئی) کوہاٹ کے دوراْفتادہ علاقے جبڑگمبٹ میں راستے کے تنازعہ پرفریقین کے مابین خونریزتصادم کے نتیجے میں دو بھائیوں سمیت 3افراد جاں بحق اورباپ بیٹوں سمیت 5دیگر زخمی ہوگئے ۔ پولیس ترجمان کے مطابق کوہاٹ کی تحصیل گمبٹ کے علاقہ جبڑکے دورافتادہ گاؤں گیدڑ ڈھوک میں دوفریقین اشرف الدین اور بہادر شاہ کے مابین مبینہ طورپر راستہ پر مستورات کے تنازعہ نے سنگین صورت اختیار کرتے ہوئے گزشتہ صبح ایک دوسرے پر فائرنگ کردی جس کے نتیجے میں فریق اول سے دو سگے بھائی اشرف الدین اور زین الدین پسران حکم دین جبکہ فریق دو م سے بہادر شاہ ولد طاہر شاہ موقع پر جاں بحق ہوگئے۔ پولیس کے مطابق فائرنگ کی زدمیں آکر فریق اول سے داوڑ دین ولد حکم دین اور سیدرحیم ولد اشرف دین شدید زخمی ہوگئے جبکہ مخالف فریق کے نوید ولد خان نواز‘ خان نواز ولد غفور الرحمن اور ولی الرحمن ولد خانہ میر فائرنگ کے نتیجے میں زخمی ہوگئے۔ واقعہ کی اطلاع ملتے ہی پولیس کی بھاری نفری جائے وقوعہ پر پہنچ گئی اور نعشوں کو سول ہسپتال گمبٹ جبکہ زخمیوں کو ڈویژنل ہیڈکوارٹر ہسپتال کوہاٹ منتقل کردیا ۔
