اسلام آباد+ فیصل آباد (نمائندہ خصوصی+ اے پی پی) وزیر مملکت اطلاعات و نشریات فرخ حبیب نے کہا کہ عمران خان کی واحد حکومت ہے جس نے تمام صوبوں کو مساوی ترقی کے مواقع فراہم کیے، پاکستان تحریک انصاف حکومت کی اولین ترجیح عوام کیلئے آسانیاں پیدا کرنا ہے، بلوچستان میں پیپلز پارٹی کاوزیر اعلیٰ ہوگا، بلاول کی یہ خواہش کبھی خبر نہیں بن سکتی۔ اتوار کو کا بلاول زرداری کے خطاب پر اپنے ردعمل میں وزیر مملکت فرخ حبیب نے کہا کہ بلاول کے منہ سے عزت کی سیاست کرنے کی بات زیب نہیں دیتی، یہ لوگ کرپشن، منی لانڈرنگ، جعلی اکانٹس اور لوٹی ہوئی دولت کو عزت دیتے ہیں۔ ادھر انہوں نے کہا کہ درخت لگانا ہماری قومی ذمہ داری ہے، ہم نے پاکستان سمیت پوری دنیا کو موسمیاتی تبدیلی کے اثرات سے بچانا ہے۔ وہ اتوار کو وزیر فیصل آباد میں شجر کاری مہم کے سلسلے میں پودا لگانے کے بعد میڈیا سے گفتگو کررہے تھے۔ علاوہ ازیں وزیر مملکت اطلاعات و نشریات فرخ حبیب نے کہا ہے کہ وزیراعظم عمران خان کی قیادت میں اسد عمراور انکی ٹیم پر مشتمل نیشنل کمانڈ اینڈ آپریشن سنٹر، این سی او سی کے500دن مکمل ہوگئے۔ این سی او سی کی بہترین فیصلہ سازی کرونا کے اثرات سے نمٹنے میں مددگار ثابت ہوئی۔وزیر مملکت فرخ حبیب نے اپنے ٹویٹ میں کہا کہ دستاویزی فلم میں دیکھا جاسکتا ہے کہ این سی او سی نے کرونا وبا سے نمٹنے کے حوالے سے قومی یکجہتی پیدا کی۔