ٹیسٹ رینکنگ : بابر اعظم دسویں پوزیشن پر موجود‘کوہلی کی تنزلی
لاہور(سپورٹس رپورٹر) انٹرنیشنل کرکٹ کونسل کی ٹیسٹ رینکنگ میں قومی ٹیم کے کپتان بابر اعظم بلے بازوں کی فہرست میں بدستور دسویں نمبر پر موجود ہیں۔ پہلی تینوں پوزیشنز پر بالترتیب نیوزی لینڈ کے کپتان کین ولیمسن، آسٹریلیا کے سٹیون سمتھ اور آسٹریلیا ہی کے مارنس لبوشین براجمان ہیں۔بھارتی ٹیم کے کپتان ویرات کوہلی ایک درجہ تنزلی کے بعد چوتھی سے پانچویں پوزیشن پر چلے گئے ہیں جبکہ انگلینڈ کے جوئے روٹ ایک درجہ بہتری کے بعد چوتھے نمبر پر آ گئے۔بائولرز کی فہرست میں پہلی 6 پوزیشنز پر کوئی تبدیلی نہیں آئی جبکہ انگلش فاسٹ بائولر جیمز اینڈرسن ایک درجہ ترقی پاکر ساتویں نمبر پر آ گئے ہیں۔
