لاہور(سپورٹس رپورٹر)کشمیر پریمیئر لیگ کی ٹیم باغ سٹالینز کے آل رائونڈر عامر یامین نے کہا ہے کہ خود کو مستندآل راونڈر منوانے کیلئے بہت کوشش کر رہا ہوں ، پہلے سے بہت بہتر محسوس کر رہا ہوں قومی ٹیم میں موقع ملا تو اس سے بھرپور فائدہ اٹھاوں گا۔ عامر یامین کی ٹیم باغ سٹالینز پلے آف میں تو جگہ نہ بنا سکی لیکن عامر یامین نے اپنی آل راونڈ پرفارمنس سے ضرور متاثر کیا اور توجہ حاصل کی۔عامر یامین نے کہا کہ کشمیر پریمیئر لیگ میرے لئے بڑی اچھی ثابت ہوئی ہے ۔شاہد آفریدی ، محمد حفیظ ، شعیب ملک اور کامران اکمل جیسے سٹارز کی موجودگی میں پرفارم کا موقع ملا جو میرے لیے بہتر ثابت ہو گا۔ کے پی ایل سے قبل خود کو آل رائونڈرز منوانے کیلئے بہت محنت کی‘ پرانے بال کے استعمال پر محنت کی‘ بیٹنگ بھی بہتر ہوئی خود کو مستند آل رائونڈر منوانا ہے اور پاکستان ٹیم کیلئے اچھا کرنا ہے۔ پہلے سے خود کو بہتر محسوس کرتا ہوں‘ موقع ملا تو فائدہ اٹھاوں گا‘ میرے لیے کے پی ایل کا تجربہ شاندار رہا ، یہاں مقابلے کی کرکٹ ہوئی۔