ابوجا (اے پی پی)نائیجیریامیں نامعلوم مسلح افراد  کی فائرنگ کے نتیجے میں 22 افراد ہلاک اور 14 زخمی ہوگئے۔ چینی ذرائع ابلاغ کے مطابق ریاستی پولیس کے ترجمان اوبہ اوگابا نے میڈیا سے گفتگو کرتے ہوئے بتایا کہ زائرین بوچی سٹیٹ میں ایک تقریب کے بعد اونڈو سٹیٹ میں اکارے کی طرف جا رہے تھے جب ریاست جوس نارتھ کے علاقے میں رکوبا روڈ پر پہنچے تو پہلے سے طاق میں بیٹھے ایر گوے کے  مقامی نسلی گروہ کے  مسلح افراد نے5 بسوں پر مشتمل زائرین کے قافلے پر فائرنگ شروع کر دی جس کے نتیجے میں 22 افراد ہلاک اور 14 دیگر زخمی ہوئے۔ ترجمان اوبہ اوگابا نے کہا کہ حادثے کے بعد پولیس ، فوج اور دیگر سکیورٹی اداروں کی ایک ٹیم فوری طور پر جائے وقوعہ پر پہنچ گئی جہاں پر21 متاثرین کو بچا لیا گیا اور6 مشتبہ افراد کو گرفتار کر لیا گیا ۔