لاہور (نامہ نگار) ٹھوکر نیاز بیگ کے قریب ایک فیکٹری کی دیوار پلاٹ میں خانہ بدوشوں کی جھگیوں پر گرنے سے دو سالہ بچی اور اس کے والد سمیت تین افراد جاں بحق  جبکہ چار زخمی ہو گئے۔ کٹار بند روڈ مدنی چوک کے قریب فیکٹری کی دیوار چار جھگیوں پر گرنے سے 2 سالہ بچی نیہا، اس کا والد 40سالہ امانت منیر اور 25سالہ فرح شفیق ہلاک جبکہ چار افراد متوفی امانت کی بیوی 30سالہ سدرہ امانت، 40سالہ سبحان،20سالہ اقراء اور 40سالہ خالد بشیر زخمی ہو گئے۔ اطلاع ملنے پر پولیس، ریسکیو 1122 اور ایدھی عملے نے موقع پر پہنچ کر زخمیوں کو ملبے تلے سے نکال کر طبی امدادکے لئے ہسپتال منتقل کردیا اور تینوں  نعشیں قبضے میں لے کر پوسٹ مارٹم کے لئے مردہ خانے جمع کرا دی ہیں۔ علاوہ ازیں جوہر ٹاؤن کے علاقے میں  ایکسپو سینٹر کے قریب ایک گھر کی چھت گر گئی۔