لاہور(سپورٹس رپورٹر) نیوزی لینڈ اور انگلینڈ کرکٹ ٹیم کے سکیورٹی ماہرین نے قذافی سٹیڈیم کا دورہ کیا اور سکیورٹی امور کا جائزہ لیا۔نیوزی لینڈ اور انگلینڈ کے دورہ پاکستان کیلئے آئے سکیورٹی ماہر ریگ ڈیکسن اور ڈہوڈ سنئیر نے پی سی بی ہیڈکوارٹر قذافی سٹیڈیم کا دورہ کیا جہاں انہوں نے سٹیڈیم میں دستیاب سہولیات کا جائزہ لیا جبکہ دوسرے مرحلے میں سکیورٹی وفد راولپنڈی جائیگا۔سکیورٹی وفد کے پلان میں پی سی بی حکام سے ملاقاتوں کیساتھ سیف سٹی لاہور آفس کا دورہ شامل ہے۔ اس کے علاوہ سکیورٹی وفد کو صوبائی اور ضلعی حکام کی جانب سے بھی میچز کے دوران سکیورٹی کی فراہمی پر بریفنگ دی جائیگی۔واضح رہے کہ اعلان کردہ شیڈول کے تحت نیوزی لینڈ کی ٹیم 11 ستمبر کو اسلام آباد پہنچے گی۔سکیورٹی ماہرین قذافی سٹیڈیم میں ڈریسنگ رومز اور گراونڈ کا جائزہ لیں گے اس موقع پر انہیں پی سی بی سکیورٹی عہدیداروں کی جانب سے بریفنگ بھی دی جائیگی۔