لاہور(سپورٹس رپورٹر)نیوزی لینڈ سیریز کیلئے پاکستان ون ڈے سکواڈ میں شامل کھلاڑیوں کی آج اپنے شہروں میں کروناٹیسٹنگ کی جائے گی۔ذرائع کے مطابق آج پاکستان ٹیم کے کھلاڑیوں اور ٹیم مینجمنٹ کے ارکان کی کرونا ٹیسٹنگ ہوگی، سکواڈ کے ارکان کو کرونا ٹیسٹنگ کے بعد تین روز محتاط رہنے کی ہدایت کی گئی ہے۔ذرائع کے مطابق سکواڈ 8 ستمبر کو اسلام آباد میں اکٹھا ہو گا اور ہوٹل میں اِن کی دوبارہ کرونا ٹیسٹنگ ہوگی، ایک روز کے قرنطینہ کے بعد 10 ستمبر کو پنڈی سٹیڈیم میں ٹریننگ کا آغاز کیا جائے گا۔ ذرائع کے مطابق نیوزی لینڈ ٹیم کی آمد 11 اور 12 ستمبر کی درمیانی شب ہوگی اور پہلا ون ڈے 17 ستمبر کو ہوگا۔واضح رہے کہ نیوزی لینڈ کے خلاف بیس رکنی ٹیم کا اعلان کیا جا چکا ہے، نیوزی لینڈ سیریز میں تین ون ڈے اور پانچ ٹی 20 میچز کھیلے جائیں گے۔ ٹی ٹونٹی سکواڈ کا اعلان آئندہ ہفتے کے آخر میں کیا جائیگا۔