اسلام آباد/کویت سٹی (این این آئی) کرونا وبا کے باعث معطل ہونے والا فضائی آپریشن بحال کردیا گیا ہے جس کے تحت پاکستان بھارت اور مصر کیلئے پروازوں کا آغاز کردیا گیا ہے۔ عرب ٹی وی کے مطابق پاکستان، بھارت اور مصر کے ساتھ آپریشن شروع جبکہ بنگلہ دیش، نیپال اور سری لنکا کے ساتھ پروازیں شیڈولنگ کی منتظر ہیں۔ کویت بین الاقوامی ہوائی اڈے نے وبائی بحران کے باعث ڈیڑھ سال کے وقفے کے بعد پاکستان، بھارت اور مصر کے ساتھ پروازیں دوبارہ شروع کیں۔ ڈی جی سی اے نے بتایا کہ سری لنکا ، نیپال اور بنگلہ دیش سے براہ راست پروازوں کے شیڈول آپریشن کا عمل جاری ہے۔ دریں اثنا کویت ایئرویز نے اپنے ٹویٹر اکائونٹ پر صارفین کو مطلع کرتے ہوئے اعلان کیا کہ کویت ایئرویز پاکستان کیلئے ہفتے میں تین براہ راست پروازیں چلائے گا جو کہ ہفتے میں دو پروازیں اسلام آباد جبکہ ایک پرواز لاہور کے لئے ہو گی۔ دوسری جانب گزشتہ روز جزیرہ ایئر ویز کی ایک پرواز کوچی (بھارت)سے جبکہ ممبئی سے کویت ایئر ویز کی 5 پروازیں کویت پہنچیں۔ ڈائریکٹوریٹ جنرل آف سول ایوی ایشن کے ڈائریکٹر آپریشنز منصور الہاشمی نے بتایا کہ وزراء کونسل کے فیصلے پر عملدرآمد نے کویت اور بھارت کے درمیان براہ راست پروازوں کی آمد اور روانگی کا مشاہدہ کیا۔