افغان عوام کیلئے 30 ٹن خوراک ، ادویات اور دیگر امدادی سامان بھجوادیا : دفتر خارجہ
اسلام آباد(نوائے وقت رپورٹ، این این آئی)حکومت پاکستان نے افغانستان کے عوام کے لئے انسانی بنیادوں پر خوراک اور ادویات پر مشتمل امدادی سامان بھجوادیا۔تین ’سی۔ 130‘ جہاز امدادی سامان لے کر افغانستان پہنچے۔ فوری امدادی سامان کی بذریعہ ہوائی جہاز فراہمی کے بعد مزید سامان سڑک کے راستے بھجوانے کا سلسلہ جاری رہے گا۔ترجمان دفتر خارجہ نے کہا کہ پاکستان کی حکومت موجودہ مشکل ماحول میں افغان بھائیوں کی ہرممکن حد تک مدد جاری رکھے گی۔ پاکستان عالمی برادری پر زور دیتا ہے کہ افغانستان کے عوام کی مدد کے لئے اپنا کردار ادا کرے تاکہ ممکنہ انسانی بحران سے بچا جاسکے۔ پاکستان سے 30 ٹن خوراک اور ادویات لے کر طیارہ افغانستان پہنچ گیا، کابل میں پاکستان کے سفیر اور افغان حکام نے امدادی سامان وصول کیا۔
