عمر شریف اور ان کے اہلخانہ کو ویزے جاری جارج واشنگٹن ہسپتال میں علاج ہو گا، اہلیہ
کراچی(این این آئی+نوائے وقت رپورٹ)وزیر اعظم کے معاون خصوصی شہباز گل کا کہنا ہے کہ لیجنڈ اداکار عمر شریف اور ان کے اہل خانہ کو امریکا کے ویزے جاری ہو گئے ہیں۔ شہباز گل نے سوشل میڈیا پر جاری اپنے بیان میں بتایا کہ عمر شریف اور ان کے اہلخانہ کو امریکا کے ویزے ایشو ہو گئے ہیں۔معاون خصوصی کا کہنا تھا کہ عمر شریف اپنے علاج کے لیے اہلخانہ کے ہمراہ جلد امریکا کے لیے روانہ ہوں گے۔شہباز گل کا کہنا تھا کہ عمر شریف اور ان کے اہلخانہ نے تعاون پر وزیراعظم پاکستان عمران خان کا شکریہ ادا کیا اور وزیراعظم بھی دعاگو ہیں کہ اللہ تعالیٰ اداکار عمر شریف صاحب کو جلد صحتیاب کرے۔دوسری جانب ایڈمنسٹریٹر کراچی مرتضیٰ وہاب کا کہنا ہے کہ عمر شریف کو لے جانے کیلئے ایئر ایمبولنس بھی کل تک کراچی پہنچ جائے گی۔ ادھرمعروف کامیڈین عمر شریف کی اہلیہ زرین عمر کا کہنا ہے کہ جارج واشنگٹن ہسپتال میں عمر شریف کے علاج کے لیے تمام تیاریاں ہوچکی ہیں۔ایک بیان میں عمر شریف کی اہلیہ کا کہنا تھا کہ ہمیں ویزا جاری ہوچکا ہے اور روانگی میں اب کوئی مسئلہ نہیں ہے، ائیر ایمبولینس کی انوائس سندھ حکومت کو بھیجی جائے گی جس کے بعد سندھ حکومت ائیر ایمبولینس کی ادائیگی کرے گی۔انہوں نے کہا کہ جارج واشنگٹن ہسپتال میں تمام تیاریاں ہوچکی ہیں، اداکارہ ریما عمر شریف کی صحت کے حوالے سے بہت پریشان ہیں۔
