لندن (نوائے وقت رپورٹ) نیوزی لینڈ کی ٹیم کی طرف سے اچانک سیریز چھوڑ کر دورہ پاکستان سے واپس جانے کے بعد جہاں کرکٹ کے شائقین کو بہت رنج پہنچا وہیں عالمی سطح پر ایسے نام بھی سامنے آئے جنہوں نے شائقین کے ٹوٹے دل جوڑنے اور انہیں حوصلہ دینے کے لئے اپنے اپنے پیغامات بھیجے اور پاکستان سے متعلق اہم اعلانات بھی کئے۔ کوئی کرس گیل کی پاکستان آمد سے متعلق خوشی مناتا نظر آ رہا ہے تو کوئی ان کی تصاویر کے ساتھ ان کا شکریہ ادا کرتا نظر آ رہا ہے۔ صارفین کی بڑی تعداد انہیں یونیورس باس بھی کہہ کر مخاطب کر رہی ہے۔ سوشل میڈیا پر اگر اس وقت کوئی ایک شخصیت سب سے زیادہ ٹرینڈ کر رہی ہے تو وہ کرس گیل ہی ہیں جو نہ صرف شائقین کو اپنے چوکوں اور چھکوں سے محظوظ کرتے ہیں بلکہ اپنے خاص انداز سے جس طرح وہ وکٹ پر جشن مناتے ہیں اور ڈانس کرتے ہیں اس سے اور بھی شائقین کو وہ اپنے فین کلب کا حصہ بنا لیتے ہیں۔ ایک اور صارف نے کرس گیل کی بابر اعظم کے ساتھ تصویر شیئر کر کے لکھا کہ ایسے لوگ دلوں میں رہنے کے لیے پیدا ہوتے ہیں۔