لاہور ( سپورٹس رپورٹر) پاکستان کرکٹ بورڈ اور کرکٹ فیڈریشن آف ازبکستان نے ازبکستان میں کرکٹ کے فروغ کیلئے معاہدے پر دستخط کردئیے ہیں۔معاہدے کے تحت پی سی بی نیشنل ہائی پرفارمنس سنٹر لاہور میں دو ہائی پرفارمنس کیمپس کا انعقاد کریگا، جہاں ازبکستان کے باصلاحیت کھلاڑیوں کو تکنیکی، ذہنی اور ٹیکنیکل معاونت فراہم کی جائیگی۔اس ضمن میں پی سی بی اپنے سٹاف کو بھی ازبکستان بھیجے گا، جو وہاں کیوریٹرز اور گراؤنڈز مین سمیت مختلف لیول کے کوچنگ کورسز بھی کروائیں گے۔معاہدے کے تحت پی سی بی کرکٹ فیڈریشن آف ازبکستان کو اینٹی ڈوپنگ، اینٹی کرپشن اور دیگر کوڈ آف کنڈکٹ سے متعلق بریفنگ بھی فراہم کریگا۔ پی سی بی ازبکستان کی ٹیم کے پاکستان ڈومیسٹک سیزن میں شرکت سے متعلق آپشن پر بھی غور کریگا۔