راولپنڈی (اپنے سٹاف رپورٹر سے )  شہباز شریف ڈویژنل صدر راولپنڈی مسلم لیگ ن ملک ابرار احمد کی رہائشگاہ گئے اور انہیں کنٹونمنٹ بورڈ کے الیکشن میں بھاری اکثریت سے مسلم لیگ ن کے امیدواروں کو کامیاب کرانے پر مبارکباد دی۔ شہباز شریف نے راولپنڈی کنٹونمنٹ بورڈ اور چکلالہ کنٹونمنٹ بورڈ کے نومنتخب  ارکان سے بھی ملاقات کی اور جو امیدوار کامیاب نہیں ہو سکے میاں شہباز شریف نے یقین دہانی کرائی کہ انہیں بھی مستقبل میں اچھی طرح اکاموڈیٹ کیا جائے گا۔ انہوں نے کہا کنٹونمٹ بورڈ انتخابات میں مسلم لیگ ن کی جیت سے پارٹی کا گراف بلند ہوا ہے۔ شہباز شریف نے کہا کنٹونمنٹ بورڈ کے انتخابات میں جس طرح مسلم لیگ ن نے متحد ہو کر الیکشن لڑا یہ ہماری جماعت کی بڑی کامیابی ہے۔ کنٹونمنٹ الیکشن میں مسلم لیگ ن کی جیت سے پی ٹی آئی کا چہرہ بے نقاب ہو گیا ہے۔ میاں شہباز شریف نے کہا کہ ن لیگ خدمت کی سیاست کرتی ہے اور آئندہ بھی کرتی رہے گی۔  مسلم لیگ ن ہی ملک کو بحرانوں سے نکال سکتی ہے۔ اللہ تعالیٰ نے مسلم لیگ ن کو موقع دیا تو ہم عوام کی تقدیر بدل دیں گے۔