لاہور، کراچی (  سپورٹس رپورٹر، خبرنگار خصوصی) نیول سپورٹس ڈائریکٹوریٹ کے زیر اہتمام پاکستان ہاکی فیڈریشن کی زیرنگرانی عبدالستار ایدھی ہاکی سٹیڈیم کراچی میں جاری چیف آف دی نیول سٹاف آل پاکستان ہاکی ٹورنامنٹ کے فائنل کیلئے پاکستان واپڈا اور نیشنل بینک نے کوالیفائی کرلیا۔دونوں ٹیموں کے درمیان فائنل آج کھیلا جائیگا۔ایونٹ کے پہلے سیمی فائنل میں واپڈا نے پاکستان نیوی کو 0-3 سے شکست دے کر فائنل کیلئے کوالیفائی کرلیا۔ فاتح ٹیم کیلئے علیم عثمان، مبشر علی اور عتیق ارشد نے بالترتیب 16ویں 26 ویں اور 59 ویں منٹ میں گول اسکور کئے۔دوسرے سیمی فائنل میں نیشنل بینک نے ماڑی پیٹرولیم کو دو گول سے شکست دیدی۔فاتح ٹیم کی جانب سے دونوں گول کپتان ابوبکر محمود نے پینالٹی کارنر پرسکور کئے۔نیشنل بینک کے گول کیپر مظہر عباس کو عمدہ کارکردگی پر میچ کا بہترین کھلاڑی قرار دیا گیا۔چیف آف دی نیول سٹاف امجد خان نیازی فائنل کے مہمان خصوصی ہونگے۔