لاہور+ اسلام آباد (نامہ نگار+ نیوز رپورٹر+ خبر نگار+ نمائندہ خصوصی) صحافی اور برطانیہ میں پاکستان کے سابق ہائی کمشنر واجد شمس الحسن لندن میں انتقال کر گئے۔ واجد شمس الحسن طبیعت ناساز ہونے کے سبب رائل فری ہسپتال میں چھ ہفتوں سے داخل تھے۔ شہباز شریف، آصف زرداری، رحمان ملک، نیئر بخاری، پیپلزپارٹی وسطی پنجاب کے صدر راجہ پرویز اشرف، جنرل سیکرٹری حسن مرتضی اور سیکرٹری اطلاعات شہزاد سعید چیمہ نے ان کے انتقال پر گہرے دکھ و افسوس کا اظہار کیا۔ انہوں نے کہا کہ اللہ تعالی واجد شمس الحسن کے درجات بلند اور لواحقین کو صبر دے۔