لاہور(سپورٹس رپورٹر)پنجاب سکواش ایسوسی ایشن کے زیر اہتمام کھیلی گئی کومبیکس سکواش چیمپئن شپ اختتام پذیر ہوگئی۔گرلز کیٹیگری میں روشنا محبوب، بوائز کیٹگری میں عشب عرفان نے سیکنڈ سیڈ سلمان سلیم کو صفر کے مقابلے میں تین سیٹ سے ہرایا جبکہ نیشنل انڈر19 اوپن سکواش چیمپئن شپ کا فائنل بھی عشب عرفان نے ہی جیتا اور دو ٹائٹل اپنے نام کرنے میں کامیاب ہوئے۔ گرلز کیٹگری کے فائنل  میں روشنا محبوب نے صائمہ شوکت کو صفر کے مقابلے میں تین سیٹ سے شکست دیکر میچ اپنے نام کر لیا۔بوائز کیٹگری کے فائنل مقابلے میں عشب عرفان نے سیکنڈ سیڈ سلمان سلیم کو صفر کے مقابلے میں تین سیٹ سے ہرا کر میچ اپنے نام کر لیا۔ نیشنل انڈر19سکواش اوپن چیمپئن شپ کے فائنل میں عشب عرفان نے خوشحال ریاض خان کو مات دی ،عشب عرفان نے پہلے دو سیٹ  اپنے  نام کیے جبکہ تیسرے سیٹ میں خوشحال خان نے انجری کے باعث مزید کھیلنے سے معذرت کر لی ۔صدر پنجاب بنک ظفر مسعو فائنل کے مہمان خصوصی تھے جبکہ اس موقع پر سی ای او کومبیکس عمر سعید،صدر پنجاب سکواش ایسوس ایشن و سیکرٹری بلدیات نورالامین مینگل، نائب صدر شیراز سلیم،ڈائریکٹر ٹورنامنٹ مامون خان،سابق سکواش سٹار گوگی علائوالدین سمیت دیگر بھی موجود تھے۔ نمایاں کارکردگی پر کھلاڑیوں میں ٹرافیاں اور نقد انعامات تقسیم کیے گئے۔