ٹیکساس(این این آئی)ٹیکساس کی پولیس نے کہاہے کہ ایک 18 سالہ نوجوان کو ٹیکساس کے ہائی سکول میں فائرنگ کے معاملے میں گرفتار کرلیاگیا۔ اس نے ایک سکول میں فائرنگ کی تھی جس کے نتیجے میں 4 افراد زخمی ہوگئے ۔غیرملکی خبررساں ادارے کے مطابق پولیس نے بتایا کہ مشتبہ شخص جو آرلنگٹن کے ٹمبر ویو ہائی سکول سے فرار ہوا کو ایک مختصر تعاقب کے بعد گرفتار کیا گیا اور اس پر مہلک ہتھیار سے حملہ کرنے کے تین الزامات عائد کیے گئے ۔انہوں نے مزید کہا کہ چار زخمیوں میں سے کم از کم دو کو گولی لگی ہے اور ان میں سے ایک کی حالت اب بھی تشویشناک ہے۔یہ بات قابل غور ہے کہ اس سال امریکی اسکولوں میں فائرنگ کے کم از کم 101 واقعات رپورٹ ہوئے جن میں 21 افراد ہلاک اور 56 دیگر زخمی ہوئے۔