لاہور(سپورٹس رپورٹر)آئی سی سی ٹی ٹونٹی ورلڈ کپ کے سب سے بڑے مقابلے پاکستان ‘بھارت ٹاکرے میں قومی سکواڈ میں شامل کھلاڑیوں کی فیملیز نے بھی پاکستان ٹیم کا حوصلہ بڑھایا۔ذرائع نے تصدیق کی ہے کہ سکواڈ کے بعض ارکان کی دبئی میں موجود فیملیز سٹیڈیم میں میچ دیکھا، قومی کھلاڑیوں کے اہلخانہ کیلئے سٹیڈیم میں خصوصی انتظامات کیے گئے تھے۔خصوصی انتظامات بائیو سکیور ببل کا حصہ ہونے کی وجہ سے کیے گئے ہیں کیونکہ سکواڈ کے ارکان کی فیملیز بھی بائیو سکیور ببل کا حصہ ہیں، یہی وجہ ہے کہ فیملیز کو بھی ماضی کی طرح آزادانہ گھومنے کی اجازت نہیں بلکہ کھلاڑیوں کی طرح ان کی سرگرمیاں بھی محدود ہیں۔محمد حفیظ، شعیب ملک، محمد رضوان، فخر زمان، حسن علی، سرفراز احمد، عماد وسیم، عثمان قادر، کوچ ثقلین مشتاق اور فزیو کلف ڈیکن کے اہلخانہ دبئی میں موجود ہیں۔