لاہور(خصوصی رپورٹر)  شہبازشریف نے پٹرولیم مصنوعات، ایل پی جی اور دیگر اشیاء کی قیمتوں میں مزید اضافے کی پارلیمنٹ کے اندر بھرپور مخالفت کرنے کا اعلان کیا ہے۔ انہوں نے کہا کہ   ٹیکس پر ٹیکس اور مہنگائی پر مہنگائی عوام کے بنیادی آئینی ومعاشی حقوق کی خلاف ورزی ہے۔ عوام کے معاشی آئینی حقوق کے تحفظ پر سمجھوتہ نہیں ہو سکتا۔ صرف اشیاء مہنگی کرنے سے معیشت ٹھیک کرنے کی کوشش سراسر حماقت ہے۔ پٹرولیم مصنوعات کی قیمتوں میں 7 سے 9 روپے مزید اضافہ عوام کا معاشی قتل ہے۔ 16 اکتوبر کو حکومت پٹرولیم مصنوعات کی قیمتوں میں 12 روپے فی لٹر تک پہلے ہی اضافہ  کا ظلم عوام پر ڈھا چکی ہے۔ شہباز شریف نے کہا کہ وہ  بار بار خبردار کررہے ہیں  کہ حکومت کو قومی معاشی خودکشی سے روکنا ہوگا، ورنہ ملک کو بھاری قیمت ادا کرنا پڑ سکتی ہے۔ بار بار منی بجٹ لا کر حکومت نے ثابت کیا ہے کہ اس کے پاس کوئی ٹھوس، سنجیدہ اور قابل عمل معاشی پلان نہیں۔ سیاسی انتشار اور معاشی تباہی دونوں مل کر پاکستان کو ناکام ریاست کی منزل کی طرف لے جا رہے ہیں۔ ملک کو اس سے بچانا ہوگا۔ عوام کی قوت خرید ختم ہوچکی ہے۔ آئین اور قانون کے تحت ڈبل ٹیکسیشن جرم ہے لیکن حکومت ڈھٹائی سے قوم کو لوٹ رہی ہے۔ ٹیکس کا تعلق عوام کی قوت خرید اور قومی ترقی کی شرح سے ہے۔ مرتی عوام پر مزید بوجھ ڈالنا صرف ظلم ہے۔ عوام اس ظلم کے خلاف باہر نکلیں اور حکومت سے ظلم کرنے کا اختیار چھین لیں۔