لاہور(سپورٹس رپورٹر)قومی کرکٹ ٹیم کے کپتان بابراعظم نے کہا ہے کہ ورلڈکپ جیسے ٹورنامنٹ میں ذرا سا ریلیکس ہوئے تو میچ ہار سکتے ہیں۔انہوں نے بتایا کہ بچپن سے ہی خواب تھا کہ دنیا کا بہترین کرکٹر بننا ہے، اپنی کارکردگی کو مزید بہتر کرنے اور اس میں تسلسل لانے کی کوشش کررہا ہوں۔ لوگوں کی توقعات ہیں کہ ہم ہر میچ میں شاندار کارکردگی کا مظاہرہ کریں، جس سے الحمداللہ مجھے اعتماد ملتا ہے، میری یہی کوشش ہوتی ہے کہ میچ جیت کر مداحوں کو خوش رکھوں۔ میرا اب یہی عزم ہے کہ ایک ایسی مضبوط ٹیم بنائی جائے جو پاکستان کا نام روشن کرے، بطور کپتان یہی کہوں گا کہ ہمیں اچھی کرکٹ تسلسل کے ساتھ کھیلنا ہوگی کیونکہ آپ ایک بڑے ایونٹ میں ہیں۔ ورلڈکپ جیسے ٹورنامنٹ میں کسی بھی موقع پر ریلیکس نہیں ہوسکتے، اگر حریف ٹیم کو ذرا سا بھی مارجن ملا تو وہ آپ سے میچ لے جائے گی۔ پاکستان کے فاسٹ بائولر شاہین شاہ آفریدی نے بابر سے متعلق کہا کہ بابر نمبر ون ہے، وہ بہت خاص کھلاڑی ہے۔پاکستان کے اوپنر اور وکٹ کیپر محمد رضوان نے کہا کہ بابر ہر کنڈیشن میں کھیل سکتا ہے، پھر چاہے وہ سیم ہو،باؤنسنگ یا سپن، دنیا بھر میں وہ میرے لیے بہترین کھلاڑی ہے۔آل راؤنڈر عماد وسیم کا کہنا تھا کہ بابراعظم دنیا کا بہترین کھلاڑی ہے، یہ میں نے 4 سال پہلے اس وقت بھی کہا تھا جب اس کے کیرئیر کی شروعات تھی، اس کی مسلسل محنت کی بدولت وہ بہت آگے تک جائے گا۔