لاہور(سپورٹس رپورٹر) آل راؤنڈر محمد حفیظ ابوظہبی ٹی ٹین سیزن فائیو کا حصہ ہوں گے۔محمد حفیظ ابوظہبی ٹی ٹین میں دہلی بلز کی طرف سے میدان میں اتریں گے۔ صہیب مقصود پہلے سے دہلی بلز کا حصہ ہیں جبکہ محمد عامر، محمد اعظم، وہاب ریاض، رومان رئیس اور انور علی بھی ابوظہبی ٹی ٹین سیزن فائیو میں ایکشن میں دکھائی دیں گے۔ابوظہبی ٹی ٹین سیزن فائیو میں 6 ٹیمیں 19 نومبر کو میدان میں اتریں گی۔ ابوظہبی ٹی ٹین کا شیڈول جاری ہو چکا ہے۔ دہلی بلز اپنا پہلا میچ 19نومبر کو ناردن وائیرز کے خلاف کھیلے گی۔ شیڈول کے مطابق پندرہ دن میں35میچز کھیلے جائے گے جبکہ لیگ کا فائنل 4دسمبر کو شیخ زید کرکٹ سٹیڈیم ابوظہبی میں ہوگا۔ حفیظ سمیت ٹی ٹین لیگ کھیلنے والے کھلاڑیوں کو پی سی بی ایک، دو روز میں این او سی دے گا، ذرائع کے مطابق محمد حفیظ نے این او سی کیلئے درخواست جمع کروادی ہے، پی سی بی کی پالیسی کے مطابق اپلائی کرنے پر ایسے تمام کرکٹرز ٹی ٹین لیگ میں شرکت کرسکتے ہیں جو پی سی بی سنٹرل کنٹریکٹ کا حصہ نہیں اور وہ کرکٹرز بھی این او سی کے اہل ہوں گے جنہوں نے ڈومیسٹک کرکٹ کے پورے سیزن کیلئے بورڈ سے معاہدہ نہیں کررکھا۔