راولپنڈی‘ اوکاڑہ (اپنے سٹاف رپورٹر سے+ نامہ نگار) اوکاڑہ دیپالپور روڈ 32 ٹو ایل کے قریب تیز رفتار ٹرک کی موٹر سائیکل کو ٹکر سے باپ بیٹی جاں بحق ہو گئے۔ جبکہ خاتون شدید زخمی ہو گئی۔ انچارج 1122 ظفر اقبال کے مطابق اوکاڑہ دیپالپور روڈ پر تیز رفتار ٹرک نے مخالف سمت سے آنے والی موٹر سائیکل سواروں کو کچل ڈالا۔ حادثہ کے نتیجہ میں 40 سالہ اکرام اپنی 3 سالہ بیٹی ماہ نور سمیت موقع پر جاں بحق ہو گیا۔ جبکہ اکرام کی بیوی شدید زخمی ہو گئی۔ جس کو ریسکیو 1122 نے طبی امداد کے لیے قریبی ہسپتال منتقل کیا جہاں اسکی حالت تشویشناک بتائی جا رہی ہے۔ پولیس کی ابتدائی تحقیقات کے مطابق حادثہ ٹرک ڈرائیور کی غفلت سے پیش آیا۔ پولیس نے فرار ڈرائیور کی تلاش شروع کر دی۔ تھانہ روات کے علاقے میں ماں بیٹا کار حادثے میں جاں بحق ہوگئے۔ روات میں ٹریفک حادثہ کو چک بیلی موڑ جی ٹی روڈ پر پیش آیا۔ 26 سالہ محسن علی اپنی والدہ 50 سالہ نسرین  کے ہمراہ کار میں سوار تھا کہ گاڑی فٹ پاتھ کے ساتھ ٹکرا گئی۔ جس سے کار کو آگ لگ گئی اور دونوں ماں بیٹا جاں بحق ہوگئے۔ ریسکیو1122 نے دونوں کی نعشیں ڈسٹرکٹ ہیڈ کوارٹرز ہسپتال منتقل کردیں۔