لاہور‘ فیروز والا‘ شیخوپورہ (نامہ نگار+ نمائندہ خصوصی+  نمائندہ نوائے وقت) تھانہ فیروزوالہ کے علاقہ مرل پار لبان والا میں مسلح افراد نے کار پر فائرنگ کر کے ایک ہی خاندان کے چار افراد کو قتل کر دیا۔ حملہ آور فرار ہوگئے۔ بتایا گیا ہے کہ اتوکے اعوان باٹا پور کا رہائشی شاہنواز اپنی بیوی زینب بی بی اور دو بچیوں کے ہمراہ کار پر سسرال لاہور سے گائوں جا رہا تھا۔ مرل پار کے قریب نا معلوم افراد نے کار پر فائرنگ کر دی جس کے نتیجہ میں شاہنواز 25  سالہ اور اس کی بیوی زینب 22 سالہ‘ دو بچیاں ہانیہ عمر 3 سال جبکہ حورین عمر4 سال  موقع پر جاں بحق ہوگئے۔  فیروزوالہ پولیس نے نعشیں ہسپتال بھجوا دیں۔ واقعہ کی اطلاع ملتے ہی پولیس حکام موقع پر پہنچ گئے  اور شواہد اکٹھے کر کے تجزیے کیلئے لیبارٹری بھجوا دیئے۔ پولیس نے مقدمہ درج کر لیا۔ وزیر اعلیٰ عثمان بزدار نے واقعہ کا نوٹس لے کر آر پی او شیخوپورہ سے رپورٹ طلب کر لی  اور قتل کی ہولناک واردات میں ملوث ملزمان کی جلد گرفتاری کا حکم دیا۔  فیروز والا پولیس  نے مقتول کے والد ملک اختر علی اعوان کی درخواست پر 4  نامعلوم افراد کے خلاف قتل کے الزام میں مقدمہ درج کر  لیا۔ پولیس  ذرائع کے مطابق شاہنواز اعوان کی گود سے ایک پسٹل بھی ملا ہے۔ پچھلی سیٹ کے دونوں اطراف کے شیشے بھی نہیں ٹوٹے اور اگلی پچھلی سکرین بھی سلامت ہیں اور کار کی بائیں طرف کا شیشہ جس پر وہ خاتون بیٹھی تھی  ٹوٹا پایا گیا۔ پولیس کے لئے قتل کی یہ واردات ایک معمہ بنی ہوئی ہے۔ بعض ذرائع کا کہنا ہے کہ یہ قتل اور خودکشی کا واقعہ  ہو سکتا ہے تاہم ہر پہلو کی روشنی میں تفتیش کی جا رہی ہے۔  لاہور  سے نامہ نگار کے مطابق آئی جی پنجاب پولیس راؤ سردار علی خان نے آر پی او شیخوپورہ سے رپورٹ طلب کی ہے۔ ڈی پی او خود موقع پر پہنچے اور جائے وقوعہ  کا جائزہ لیتے ہوئے فرانزک ٹیموں کی مدد سے تمام شواہد اکٹھے کر لئے گئے۔