اسلام آباد (خبر نگار خصوصی +آئی این پی+ اے پی پی) وفاقی وزیر اطلاعات و نشریات چوہدری فواد حسین نے کہا  ہے کہ  ٹیکسٹائل ایکسپورٹ20 بلین ڈالر کے ہدف کے حصول کے قریب ہیں اور پاکستان T-20 کے بعد ٹیسٹ میں بھی شاندار میچ جیت گیا، مجال ہے کوئی اچھی خبر ہمارے میڈیا پر آجائے، کہتے ہیں لوگ اچھی خبروں میں دلچسپی نہیں لیتے یہ اچھی منطق ہے۔ ایک ٹویٹ میں انہوں نے کہا کہ چاول کی9 ملین ٹن کی ریکارڈ فصل ہوئی، 4.75 ارب ڈالر کی ایکسپورٹ ہوگی۔ چینی، ٹماٹر، پیاز مسلسل قیمتیں کم ہو رہی ہیں۔ ایک اور ٹویٹ میں انہوں نے کہا ہے کہ 1971ء  کے سانحہ کے پس منظر میں بننے  والی فیض علی کی فلم کھیل کھیل میں کا پریمیر دیکھا‘ سقوط ڈھاکہ  کے نتیجے میں جس انسانی المیے نے جنم لیا۔ اس پر بہت کم کام ہوا ہے۔ پوری ٹیم انتہائی مبارک کی مستحق ہے کہ اس نے انتہائی مشکل موضوع کو بہت سنبھال کے چلایا‘  یہ فلم ضرور دیکھیں۔